1Ti 1 | WSK | STEP | Ani Paul, Jesus Kristus ko apostle, wore tam gawa imi bataguru ni Timothy kisisam. Anananga Saonga Kari Kaem, our hope se Jesus Kristus, nu tairukko ana ko kimi tuiwasan, mu nuna ani apostle ko aga balman. Se ni den gilalong yawara te aninga kuriang nunguning. Nanga Ba Kaem, se nanga Kari Biya Jesus Kristus ilak, nunga nongomang bataga, nunga saonga yawara, se nunga nongomang lila ni kisimon se te bagerko.

1 Timothy 1

Den gira

1 Ani Paul, Jesus Kristus ko apostle, wore tam gawa imi bataguru ni Timothy kisisam. Anananga Saonga Kari Kaem, our hope se Jesus Kristus, nu tairukko ana ko kimi tuiwasan, mu nuna ani apostle ko aga balman. Se ni den gilalong yawara te aninga kuriang nunguning.

Nanga Ba Kaem, se nanga Kari Biya Jesus Kristus ilak, nunga nongomang bataga, nunga saonga yawara, se nunga nongomang lila ni kisimon se te bagerko.

Timothy kausa kawel kari nunga den menawurokko Paul maonam

3 Tom ani Macedonia nama se nika manem turantala aking ka manorsam: ni am Ephesus bagerko. Ale mu te kari saki Kaem ko den balu se ikia kawel saki karogo kariimet nunga manorsan, wore nunga manaru se bita tamonko. 4 Nuna dugu duap kawel kawel me balmonko. Ale nunga usir taleng alo nunup te, eng tai nunga nonet alo nunup te nunga den kawel kawel balu lagasan owore bita tamonko. ^{▼▼1 Tim 1:4 Kari saki ikia kawel, se dugu duap kawel balukasan: 1 Tim 4:7; 6:4; 2 Tim 4:4; Titus 1:14.} Dugu duap uwuta mu Kaem ko ura me sangarso. Mena. Mu kariimet ngual nungarso, se eng te den tagisan gurugumusan. Bare ni ikisam, Kaem ko ura mu nangamang ningi nunguning te nama lagoso.

5 Ani ni uwutata nunga manaruko ka manorsam mu ko duap mu iwita: aninga angamang mu Kris alo ikia diram la, se nongomang karur mena, nongomang ningi nunguningkiri te bagomonko, mu te asele nuna nunumi ninguru ko kuemonko. 6 Kariimet saki nuna munan yawara yawara imi nubiring tuman, ale aitak den nunguning mena wore te nguala sipa se anisan. 7 Nuna nunumi balsan Law Den ko kausa kari ma balsan, ale den mu biyala baluwasan. Bare nuna den mu ko nunguning ninguru me ko ikisan.

8 Ana ikisan, Law Den mu ningo. Bare ana te ura diram betenak mu asele kariimet nunga sangukko. ^{▼▼1 Tim 1:8 Law Den anananga memek wetang te beteso: Rom 3:10-11; 7:7-14; Gal 3:19.} 9 Ale ana imi karogo ko ikisan: Law Den mu kariimet diram alo nogo ko me aniso. Den mu kariimet iwita wore den ningi nunga awurokko aniso: kariimet munan kulukursan ale kari supuling nuguring bowa ningi me anisan. Se kariimet Kaem nubiring tusan ale kilek memek betesan. Se kariimet Kaem ko den mu kawel masan ale ali imi ko munan karo tusan. Se kariimet nunga nunam nonet nunga mosan se kuesan. Se kariimet sang saki alo nunga mosan se kuesan. 10 Se kariimet saman katagot munan betesan. Se kariimet Sodom wonong ko kariimet kilek bitakasan mu turan betesan.

Se kariimet wonong saki ko kariimet tere nunga gisan ale (nunga) ura dungan ko nunga awusan. Se kariimet kawela gilingisan. Se kariimet saki alo den kawel te nunga atumusan. Se kariimet anapeya munan betesan se nononga munan mu den gilalong yawara karogo me terong mam, kariimet suen la umutang den ningi namomonko borta ko Law Den aniso. 11 Kaem amilmil ko duap, nikinang te se lila te bagoso, nu ko den gilalong yawara umutang ani kariimet nunga manikko ani agiting te beteram.

Kristus nu gomang Paul tuam wore ko amilmilakaso

12 Ani nanga Biya Jesus Kristus amilmil tusam. Mu awuk, nu ani angamang ningi nunguning te ko ura bitirikko mu aga ikiam ale ura aisam ale sokel aisam. ^{▼▼1 Tim 1:12-13 Kari Biya Jesus Paul ura tuam: Acts 9:15; 1 Cor 15:9-10; Gal 1:15-16.} 13 Ani awukaya girakala noko nup balu maguwukasam, noko den nunguning ninguru ira kutuwukasam, ale ko Kris alo ninguru nunga bita maguwukasam, bare nu gomang am ani aisam. Mu awuk, ani uwuta bitakasam bare mu ani nu ko angamang ningi me nunguning akaso, se aking kilek memek bitakasam mu ani kilek ningo betesam ko balukasam ale eng am bitakasam. 14 Bare Kari Biya Jesus Kristus gomang tawun biya ani aisam, se ani noko angamang ningi nunguning aram se angamang gurugu tuem.

15 Den imi mu den nunguning, se nina am ko nengemang ningi nunguning arukko: Jesus Kristus ana kariimet memek wore nanga giokko ali ewerete tairam. Se memek betera kari suen la nunga ningi ani agata mu am memek biya. 16 Se borta ko Jesus Kristus ani gomang aisam, kariimet aninga dugu duap imi te ikimon ale “Kristus mu gomang nangara ko kari nunguningkiri!” mamon, ale agotala noko nongomang ningi nunguning aruk, se marak yawara tom suen biya te bagara ko mu tamonko. ^{▼▼1 Tim 1:16} 17 Se ana nanga Kaem, nu tom suen biya King ko bagoso, nu me ta kuerukko, nu ariga ko koma mena, ale nu kota diram Kaem nunguning, mu ko nup tom suen biya patawu se laganakko. Nunguning.

Timothy sokel ago sanamurukko Paul den maonam

18 Aninga kuriang Timothy, ani den Kris alo Korang Bur te nika kimik te balman mu ko iki se iwita ka manorsam: den nuna balman mu ilukuawur ale kager kari yawara sokel ago sanamoso iwitata ni te sokel ago sanamirko. ^{▼▼1 Tim 1:18 Den Kris alo Timothy kumik te balman: 1 Tim 4:14.} 19 Ale ka gemang ningi nunguning ilukuawur ale munan ni keta ikisam diram umutang la bitarko. Kari saki munan nuna ikisan diram mena wore nuna am beteman, ale nunga nongomang ningi nunguning mu eng te maguwuman. Hymenaeus Alexander ilak mu uwutatala beteman. Se ani kari memek Satan kuting te nunga awurem, mu nuna te ikimon ale udagi Kaem nup me karogo kapomon ale maguwumonko. ^{▼▼1 Tim 1:20 Paul kari ilagala Satan kuting te nunga awuram: 1 Cor 5:5.}

20